Guðný Böðvarsdóttir, ekkja Hvamm-Sturlu, fór ásamt ástmanni sínum Ara sterka Þorgilssyni í rómantíska skemmtiferð til Noregs í lok 12. aldar. Þau bárust mikið á enda voru auraráðin góð. Guðný og Ari voru nefnilega að eyða föðurarfi Snorra Sturlusonar sem hann fékk ekki greiddan við lát föður síns. Þessi Noregsferð hjónaleysanna endaði þó ákaflega illa.

Það er gömul saga og ný að fólki finnst ákaflega gaman að eyða annarra manna peningum. Þingmenn hafa skattfé almennings til ráðstöfunar og finnst sérlega skemmtilegt að veifa skúffupeningum framan í heiminn. Íslenska utanríkisþjónustan keypti á dögunum 363 fm íbúð í Osló fyrir 750 milljónir. Ríkmannleg umsvif utanríkisþjónustunnar á húsnæðismarkaði eru reyndar annáluð eins og allir vita sem hafa skoðað sendiherrabústaðinn í Berlín.

Dómsmálaráðherra leysti mál vararíkissaksóknara með því að setja hann á lögbundin eftirlaun í 9-10 ár án vinnuframlags. Þessi gjörningur kostar skattborgara landsins hátt í hálfan milljarð. Það vefst þó ekki fyrir stjórnmálamönnum landsins enda kemur hann ekki úr þeirra vasa.

Á hverju ári úthluta þingmenn íslenskum ríkisborgararétti til nokkurra útvalinna einstaklinga fram hjá eðlilegu stjórnkerfi. Íslenskt ríkisfang er mikils virði enda fylgir því ferðafrelsi og aðild að umfangsmikilli samtryggingu. Þingmenn umgangast þessi réttindi af fullkominni léttúð og deila út íslenskum vegabréfum eins og gjafaáskrift að Heimildinni. Enginn veit í raun hvaða reglum fylgt er en þarna eru stjórnmálamenn að útdeila miklum fjármunum að eigin geðþótta.

Ara Þorgilssyni varð hált á því að eyða erfðafé Snorra frænda míns enda kunni hann sér ekki hóf fremur en íslenskir pólitíkusar. Hann færðist allt of mikið í fang í aflraunakeppni með heimamönnum. Þeir höfðu rangt við og Ari stóð skyndilega einn undir ofurþunga heils siglutrés. Þetta varð hans bani svo að þessi rómantíska skemmtiferð þeirra hjónaleysa fékk dapurlegan endi. Margur verður af aurum api, stendur í Hávamálum. Það má heimfæra bæði á Ara sterka og þekkta stjórnmálamenn sem veifa kreditkortum þjóðarinnar framan í heiminn.