Robert Kennedy Jr. heilbrigðisráðherra Bandaríkjanna hefur verið umdeildur m.a. fyrir að lýsa yfir efasemdum um gagnsemi bólusetninga og um margt annað sem viðkemur nútíma þekkingu í læknisfræði. Auknar efasemdir vestanhafs um bólusetningar hafa meðal annars orðið til þess að mislingar eru farnir að gera vart við sig í auknum mæli. Ráðherrann forðaðist að svara beint spurningum, á fundi þingnefndar fyrr í dag, um bólusetningar en sagði þó við þingmenn að hann teldi að fólk ætti ekki að horfa til hans í leit að ráðgjöf um læknisfræðileg viðfangsefni.

Kennedy svaraði spurningu þingmanns um hvort hann myndi láta bólusetja börn sín í dag væru þau tiltölulega nýfædd ekki beint í fyrstu en viðhafði þess í stað ummælin um að hann væri ekki rétti maðurinn til að leita til í leit að læknisfræðilegum ráðum.

Í umfjöllun NBC um þessi ummæli kemur fram að í Texas og víðar í Bandaríkjunum hafi nú þegar tvö börn og einn fullorðinn einstaklingur dáið úr mislingum en hin látnu voru ekki bólusett gegn sjúkdómnum. Í stað bóluefna hafði Kennedy mælt með notkun steralyfs, sýklalyfs og lýsis til að berjast gegn mislingunum en engar sönnur hafa verið færðar á gagnsemi umræddra lyfja og lýsis gegn sjúkdómnum.

Skipti ekki máli

Lýsi er ríkt A-vítamíni sem getur í of stórum skömmtum valdið uppköstum og lifrarskemmmdum, sérstaklega í litlum börnum,

Tjáði hann loks þingmönnum að hann myndi líklega láta bólusetja börn sín í dag gegn mislingum en skoðanir hans á bóluefnum skipti ekki máli.

Aðspurður um hvort hann myndi láta bólusetja þau gegn hlaupabólu og lömunarveiki neitaði hann að svara og sagðist ekki vilja veita ráð um slíkt.

Kennedy á 6 börn sem eru öll bólusett en hann segist sjá eftir því að það hafi verið gert.

Rosa Delauro þingmaður Demókrata gagnrýndi Kennedy á fundinum og sagði að það væri skelfilegt að sjálfur heilbrigðisráðherra landsins hvetti til þess að foreldrar létu ekki bólusetja börn sín.

Kennedy gerði lítið úr mislingafaraldrinum í Bandaríkjunum og sagði tíðni smita mun hærri í nágrannalöndunum Mexíkó og Kanada.

Það sem af er þessu ári hafa yfir 1.000 mislingatilfelli verið tilkynnt í Bandaríkjunum sem er það mesta á þessari öld fyrir utan árið 2019. Talið er líklegt að fjöldinn sé töluvert meiri þar sem í mörgum tilfellum er ekki tilkynnt um smitin.