Thomas Tuchel, landsliðsþjálfari Englands, var á sama máli og stuðningsmenn enska liðsins sem voru hundfúlir með frammistöðu liðsins í gær.

England lenti í töluverðum vandræðum gegn smáliði Andorra og skoraði aðeins eitt mark og vann að lokum 0-1 sigur.

England var vissulega mun sterkari aðilinn í leiknum en hefði á venjulegum degi skorað mun fleiri en eitt mark í svona viðureign.

,,Ég er alls ekki ánægður með frammistöðuna. Við byrjuðum fyrstu 20-25 mínúturnar vel og það var eini tímapunkturinn sem mér leið vel,“ sagði Tuchel.

,,Við sköpuðum mörg færi og það leit út fyrir að markið væri að koma. Á endanum þá misstum við skriðtökin og vorum komnir í stöðu þar sem útlitið var ekki bjart.“

,,Ég var mest pirraður á síðustu 20 mínútunum því ég var ekki hrifinn af hugarfari leikmannana og hvernig þeir réðust á leikinn. Þetta var leikur í undankeppninni og er á útivelli. Ég var alls ekki hrifinn.“