Óskar Hrafn Þorvaldsson, þjálfari KR, skaut á Túfa, þjálfara Vals, eftir 6-1 tap Vesturbæinga gegn Hlíðarendafélaginu í Bestu deild karla í gær.

Valur komst yfir í leiknum og KR jafnaði, en svo rúlluðu lærisveinar Túfa algjörlega yfir gestina. Það mátti heyra pirring á meðal stuðningsmanna KR í stúkunni og var Óskar til að mynda spurður út í það í viðtali við Fótbolta.net eftir leik.

„Stuðningsmenn KR eru þeir bestu á Íslandi. Þeir klappa fyrir okkur þegar vel gengur. Það var líka klappað fyrir okkur í mótlæti og þeir eru í fullum rétti til að sýna skoðun sína. Ég ætlast ekkert til þess að allir KR-ingar skilji hvað ég er að reyna gera. Fæstir skilja það. Sérfræðingar sem eru að fjalla um fótbolta skilja það alls ekki. Umræðan og hugmyndin um íslenskan fótbolta er að hann er úrslitabransi eingöngu. Þegar að menn fara að horfa á slíkt gleymist oft þetta að það þarf líka að byggja upp. Þegar þú átt ekki neitt þarf að búa eitthvað til. Það gerist ekki á einni nóttu,“ sagði Óskar, sem skaut svo sem fyrr segir á kollega sinn í sama viðtali.

„Leikurinn í dag endurspeglar muninn á mér og Túfa. Ég veit ekki hvort þið tókuð eftir því en Valsmenn gerðu enga sérstaka tilraun til að spila fótbolta. Valur er samt eitt besta lið landsins. Þeir gerðu alls ekki tilraun til að spila fótbolta í dag. Þeir fóru fram, þeir fóru langt þeir keyrðu á það sem þeir töldu vera veikleika okkar. Vel gert hjá þeim.“

KR er í tíunda sæti Bestu deildarinnar með 13 stig eftir 12 leiki, stigi fyrir ofan fallsæti.