Fótboltamaðurinn Quincy Promes hefur verið sendur aftur til Hollands og mun þar sitja í fangelsi næstu sjö árin.

Þetta kemur fram í hollenskum miðlum í dag en Promes hefur verið undir rannsókn í um tvö ár – hann var ákærður fyrir að stinga frænda sinn með hníf og þá taka þátt í því að smygla eiturlyfjum inn til landsins.

Promes er í dag búsettur í Dubai en hann var handtekinn fyrir um viku síðan og yfirheyrður af lögreglunni í Hollandi.

Promes hefur nú verið skipað að mæta fyrir framan dómara og útskýra mál sitt en hann mun sitja á bakvið lás og slá í sjö og hálft ár samkvæmt þessum fregnum.

Promes var fyrst ákærður fyrir rúmlega tveimur árum síðan en neitaði að snúa aftr til heimalandsins og hefur undanfarið leikið með liði Dubai United í einmitt Dubai.

Fyrir það þá var leikmaðurinn staðsettur í Rússlandi hjá Spartak Moskvu en hann var gríðarlega efnilegur leikmaður á sínum tíma.

Promes er 33 ára gamall í dag og á að baki 50 landsleiki fyrir Holland en ljóst er að hans ferli sem atvinnumanni er lokið.