Það var knattspyrnuveisla í Víkinni í kvöld þegar KR heimsótti heimamenn, umdeildir dómar og mikill skemmtun einkenndi leikinn.
Helgi Guðjónsson kom Víkingi yfir eftir tólf mínútna leik af vítapunktinum, Valdimar Þór Ingimundarson hafði þá fiskað vítaspyrnu. Ekki voru allir sannfærðir um dóminn.
Jóhann Ingi Jónsson dómari leiksins var svo í sviðsljósinu eftir hálftíma leik þegar Karl Friðleifur Gunnarsson varnarmaður Víkings varði boltann inni í teig.
Jóhann dæmdi víti en rak Karl Friðleif ekki af velli en samkvæmt reglunum átti að gera það. Jóhannes Kristinn Bjarnason skoraði af öryggi úr vítinu og jafnaði.
Það var svo Karl Friðleifur sem kom Víkingi yfir á 43 mínútu. Adam var þó ekki lengi í paradís því tveimur mínútum síðar jafnaði Matthias Præst fyrir gestina úr KR.
Eina mark síðari hálfleiks skoraði Gunnar Vatnhamar með skalla eftir glæsilega hornspyrnu frá Gylfa Þór Sigurðssyni.
Víkingar áfram á toppi deildarinnar eftir sigurinn en KR í níunda sæti og aðeins tveimur stigum frá fallsæti.
