Emilía Kiær Ásgeirsdóttir var ekki valinn í íslenska landsliðshópinn fyrir EM í Sviss vegna meiðsla, en hópurinn var opinberaður í dag. Landsliðsþjálfaranum þótti sárt að tilkynna henni þetta.

Emilía, sem er á mála hjá RB Leipzig í Þýskalandi, er að glíma við meiðsli sem hún nær sér ekki af í tæka tíð fyrir mót. Því var haldið opnu allt þar til á síðustu stundu, hvort hún yrði með eða ekki.

„Hún var mesta spurningamerkið, varðandi hvort hún yrði klár eða ekki. Eftir skoðanir og annað var þetta ekki gerlegt. Við urðum að taka þá leiðinlegu ákvörðun að tilkynna henni að þetta væri ekki hægt og að hún kæmist ekki með,“ sagði Þorsteinn Halldórsson landsliðsþjálfari við 433.is í dag.

Hann þurfti að taka nokkur erfið símtöl vegna valsins og heyrði hann í Emilíu í gær.

„Erfiðasta símtalið var við Emilíu sjálfa. Hin símtölin voru auðvitað erfið en þau eru samt mikilvæg. Það skiptir máli að geta sagt þetta við leikmenn persónulega, að minnsta kosti í símtali.“