Stuðningsmenn Manchester City eru allt annað en sáttir við Kyle Walker þessa stundina vegna ummæla kappans.
Walker hefur að öllum líkindum spilað sinn síðasta leik fyrir City. Hann var á láni hjá AC Milan seinni hluta síðustu leiktíðar en á ár eftir af samningi sínum í Manchester.
Bakvörðurinn var áður á mála hjá Tottenham og sagðist hann myndu skipta einum af sex Englandsmeistaratitlum sínum hjá City fyrir að vera hluti af liði Tottenham sem vann langþráðan titil á dögunum með því að sigra Evrópudeildina.
„Það væri erfitt en það væri sérstakt að vera hluti af þessu Tottenham-liði,“ sagði Walker.
Óhætt er að segja að stuðningsmenn City hafi tekið þessu illa og hafa þeir látið hann heyra það á samfélagsmiðlum. Einhverjir veltu því fyrir sér hvernig það gat orðið að hann bæri fyrirliðabandið hjá félaginu.
