Hinn efnilegi Roony Bardghji virðist vera á förum frá FC Kaupmannahöfn og er áhuginn mikill.

Samningur þessa 19 ára gamla kantmans í dönsku höfuðborginni rennur út um áramótin og verður félagið að selja hann í sumar til að missa hann ekki frítt.

Aftur á móti er Roony þar af leiðandi fáanlegur ódýrt og hyggjast önnur félög nýta sér það.

Portúgalska stórliðið Porto hefur þegar lagt fram tilboð og nú er Marseille komið í viðræður við FCK. Það er því nokkur samkeppni um hann.

Roony kom aðeins 15 ára gamall inn í unglingalið FCK frá Malmö í heimalandinu. Hefur hann sýnt góða spretti en var meiddur nær allt síðasta tímabil.

Þess má geta að Roony skoraði sigurmark FCK gegn Manchester United í Meistaradeildinni á þarsíðustu leiktíð.

Roony á að baki níu U-21 árs landsleiki fyrir Svía og hefur skorað í þeim tvö mörk.