Arnar Gunnlaugsson landsliðsþjálfari Íslands segir það tóma þvælu að leikmenn sem eru hjá Stellar umboðsskrifstofunni hafi einhvern forgang hjá honum í landsliðinu.

Þeim samsæriskenningum hefur verið reynt að halda á lofti eftir að Arnar varð landsliðsþjálfari en Bjarki Gunnlaugsson bróðir hans starfar hjá Stellar og sér um íslenska leikmenn þar.

Mikael Nikulásson tók viðtal við Arnar í Þungavigtinni í dag og tók dæmi um Bjarka Stein Bjarkason sem hefur verið í fyrstu tveimur hópunum hjá Arnar. Bjarki dróg sig út úr hópnum á dögunum og inn kom Dagur Dan Þórhallsson sem hefur spilað meira með félagsliði en Bjarki undanfarið.

Bjarki er skjólstæðingur Stellar og spilar með Venezia í Seriu A á Ítalíu en hefur lítið spilað undanfarið ár.

„Hann er að spila taktísakn leik í Seriu A, það er enginn hægri bakvörður að spila af neinu viti. Dagur Dan er að spila sem kantmaður, Valgeir er lítið að spila og Bjarki lítið að spila. Ég vildi hafa einhvern sem þekkir kerfið mitt, Bjarki Steinn var valin sem varabakvörður fyrir Gulla. Dagur Dan er á lista yfir þeim sem koma inn og út, hann var eflaust mjög hissa að hafa fengið mínútur gegn Skotum en stóð sig vel,“ sagði Arnar um málið við Þungavigtina.

Hann sagði að Dagur Dan væri nú á undan Bjarka í röðinni ef staðan yrði óbreytt í haust. „Núna er Dagur komin á undan Bjarka, ef sama staða kemur upp í haust þá er hann komin lengra með það sem við viljum gera. Þú tekur ákvarðanir.“

Mikael ítrekaði þá spurningu sína um það hvort tengsl við Stellar skiptu máli. „Það er bara þvæla, bara algjör þvæla. Ef ég gerði það, þá hefði Hörður Björgvin ekki byrjað gegn Skotlandi heldur Daníel Leó. Jói Berg og Aron Einar eru ekki Stellar leikmenn, Albert er ekki Stellar leikmaður. Þetta er þvæla.“