Arne Slot, stjóri Feyenoord, er orðinn verulega þreyttur á spurningum um Liverpool en hann er líklega að taka við liðinu í sumar.
Slot er talinn vera eftirmaður Jurgen Klopp á Anfield en hann fær reglulega spurningar um næsta skrefið.
Nú er Hollendingurinn kominn með nóg eftir stanslausar spurningar í nokkrar vikur og varð pirraður á blaðamannafundi á föstudag.
,,Í 25. skiptið þá get ég ekki svarað þessari spurningu,“ sagði Slot um hvort hann væri að taka við Liverpool.
,,Ef þessar spurningar halda áfram þá verður þetta afskaplega leiðinlegur blaðamannafundur.“
,,Ég tel að það sé rétt að svara öllum þessum spurningum í lok tímabils. Ég er enn í starfi hjá Feyenoord og Liverpool er að spila sitt tímabil.“
