Íþróttavikan heldur áfram að rúlla á 433.is og í Sjónvarpi Símans undir hlekk Hringbrautar. Þeir Helgi Fannar Sigurðsson og Hrafnkell Freyr Ágústsson stýra þættinum og að þessu sinni var gestur þeirra tónlistarmaðurinn Patrik Atlason, Prettyboitjokko.

Eins og flestir vita leggur Patrik mikið upp úr tísku. Hann vill að íslenskir knattspyrnumenn fái meira frjálsræði til að vera eins og þeir vilji þegar þeir mæta á leikstað og þess háttar í stað þess að vera skikkaðir að vera í æfingagöllum eins og hann man vel eftir frá sínum ferli.

„Við Íslendingar erum stundum svo miklir sveitamenn og við erum eftir á í þessu,“ sagði Patrik í þættinum.

Patrik segir að leikmenn verði að fá að vera þeir sjálfir og að það þurfi ekki að bitna á fótboltanum.

„Eins og með góðvin minn Adam Pálsson (leikmann Vals), fólk fattar ekki hvað hann gerir fyrir þessa deild. Eins og með myndbandið sem hann birti þar sem hann sýndi frá því að hann hafði valið Val.

Ég vil meina að það hafi kostað Val titilbaráttuna að setja Adam á bekkinn. Adam er stór karakter, ein stærsta stjarna deildarinnar. Þegar þú setur hann á bekkinn fer þetta að snúast um það. Það fer einhver kapall af stað.

Arnar (Grétarsson þjálfari Vals) heldur að Adam pæli ekki nóg í fótbolta af því hann er að byggja sitt brand upp utan vallar. En sem þjálfari verður þú að átta þig á því að það er eitthvað annað í gangi en bara fótbolti. Adam stækkar deildina og stækkar þitt lið. Hann er að hugsa um fótbolta allan tímann og þetta er partur af því.“

Umræðan í heild er í spilaranum.