Nicas Kjeldsen, yfirmaður knattspyrnumála hjá Lyngby segir Gylfa Þór Sigurðsson ekki vera á eftir peningum nú þegar hann ræðir við félagið um að semja við það.

Danska félagið vill semja við Gylfa Þór en hann hefur heimsótt félagið í Kaupmannahöfn.

„Við teljum að þetta líti vel út, það er enginn samningur en við vonumst til að það klárist,“ segir Kjeldsen.

Kjeldsen segir að peningar séu ekki það sem Gylfi Þór sé að eltast við á þessum tímapunkti.

„Peningar eru ekki það eru að drífa hann áfram, hann vill koma ferli sínum af stað aftur og sýna heiminum að hann sé enn góður leikmaður.“

Kjeldsen segist hafa rætt þá staðreynd við Gylfa að hann hafi ekki spilað fótbolta í tvö ár vegna rannsóknar lögreglunnar í Englandi á meintu broti hans. Málið var fellt niður eftir tæp tvö ár í rannsókn.

„Þetta snýst um það hvar þú ert sem persóna eftir svona hluti sem þú ferð í gegnum, við höfum rætt það ítrekað. Við teljum að hann sé maður sem vill sanna ágæti sitt.“