Gylfi Þór Sigurðsson er í viðræðum við DC United um að ganga í raðir liðsins sem leikur í MLS deildinni í Bandaríkjunum. Þetta herma heimildir 433.is.

Þjálfari DC United er Wayne Rooney fyrrum samherji Gylfa Þórs hjá Everton. Með liðinu leikur svo hinn öflugi Guðlaugur Victor Pálsson.

Samkvæmt heimildum 433.is hafa viðræður Gylfa við DC United þokast vel og mun hann heimsækja félagið á næstu dögum.

Gylfi Þór hefur ekki leikið knattspyrnu undafarin tvö ár en endurkoma hans á völlinn virðist nú nálgast og mestar líkur á að endurkoman verði í MLS deildinni.

Gylfi Þór fagnar 34 ára afmæli sínu í haust en fyrir utan eitt og hálft ár í Þýskalandi hefur Gylfi verið búsettur í Bretlandi frá árinu 2005.

Samningur hans við Everton rann út fyrir ári síðan en rannsókn á máli hans í Bretlandi var felld niður í vor þar sem engar líkur voru taldar á að hann yrði dæmdur fyrir meint brot.

„Þetta er mjög langur tími sem hann hefur ekki getað spilað fótbolta. Í ljósi niðurstöðu málsins þá vona ég að hann geti fundið leiðina aftur inn í leikinn. Það er enginn ástæða fyrir því að hann ætti ekki að geta það,“ sagði Mark Haslam lögmaður Gylfa Þórs í samtali við 433.is á sínum tíma.

„Þetta hefur verið mjög erfiður tími fyrir hann og fjölskylduna. Sá tími hefur verið gerður erfiðari með miklu af ónákvæmum upplýsingum sem gefnar voru fjölmiðlum og settar í loftið,“ segir Haslam.

MLS deildin er alltaf að komast betur á kortið en koma Lionel Messi þangað í sumar mun setja augu heimsins á deildina.