Real Madrid hefur staðfest að Sergio Ramos fyrirliði liðsins hafi greinst með COVID-19 í prófi sem hann fór í hjá félaginu í gær.

Smit Ramos kemur upp rúmri viku eftir að liðsfélagi hans Rapahel Varane greindist með veiruna.

Ramos var frá vegna meiðsla og því hefur veiran ekki þau áhrif að Real Madrid missi hann út, félagið hefur spilað án hans síðustu vikur.

Ramos verður heima á Spáni þegar Real Madrid heimsækir Liverpool í Meistaradeildinni á morgun, liðið vann 3-1 sigur á Liverpool í fyrri leiknum en baráttan á Anfield verður hörð.

Real Madrid vonast til þess að Ramos komi inn á næstu vikum þegar hann hefur jafnað sig af meiðslum og veirunni.