Manchester United tók á móti Newcastle United í 25. umferð ensku úrvalsdeildarinnar í gær. Leikurinn endaði með 3-1 sigri Manchester United en leikið var á heimavelli liðsins, Old Trafford. Marcus Rashford kom Manchester United yfir í leiknum með marki á 30. mínútu.
Sex mínútum síðar jafnaði Allan Saint-Maximin, metin fyrir Newcastle og stóðu leikar því í hálfleik, 1-1. Daniel James kom Manchester United yfir með marki á 57. mínútu eftir stoðsendingu frá Bruno Fernandes. Það var síðan Bruno sem innsiglaði 3-1 sigur Manchester United með marki úr vítaspyrnu á 75. mínútu.
Manchester United er eftir leikinn í 2. sæti deildarinnar með 49 stig. Á forsíðum enskra blaða í dag er hins vegar mest rætt um manninn sem sá um skiltið til að skipta leikmönnum Manchester United inn á völlinn.
COVID-19 smit hefur greinst hjá þjálfarateymi liðsins og því þurfti Ole Gunnar Solskjær að finna sér nýja aðstoðarmenn í gær. Varamarkvörðurinn Lee Grant var á meðal þeirra, hann sá um skiltið þegar Solskjær vildi gera breytingar á liði sínu.
Grant er líklega á sínu síðasta tímabili sem leikmaður en taldar eru líkur á að hann fái þjálfarastarf hjá félaginu.