Dagar Anthony Martial hjá Manchester United gætu senn verið á enda en franski framherjinn hefur verið afar slakur á þessu tímabili. Martial var öflugur á síðustu leiktíð en hefur í ár átt í miklum vandræðum.
Manchester United tók á móti Newcastle United í 25. umferð ensku úrvalsdeildarinnar í gær. Leikurinn endaði með 3-1 sigri Manchester United en leikið var á heimavelli liðsins, Old Trafford. Marcus Rashford kom Manchester United yfir í leiknum með marki á 30. mínútu.
Sex mínútum síðar jafnaði Allan Saint-Maximin, metin fyrir Newcastle og stóðu leikar því í hálfleik, 1-1. Daniel James kom Manchester United yfir með marki á 57. mínútu eftir stoðsendingu frá Bruno Fernandes. Það var síðan Bruno sem innsiglaði 3-1 sigur Manchester United með marki úr vítaspyrnu á 75. mínútu.
Martial var í byrjunarliði United en gerði lítið sem ekkert til að hjálpa liði sínu að vinna leikinn, franski framherjinn hreyfðist lítið og eftir því tók Ole Gunnar Solskjær.
„Hreyfðu þig Anto,“ öskraði Solskjær af bekknum og skilaboðin virtust ekki skila sér til framherjans. „Farðu að hreyfa þig,“ öskraði Solskjær þá aftur.
Martial á það til að standa helst til of mikið og hreyfir því ekkert varnarlínu andstæðingana. „Ef þú vilt taka liðið þitt á næsta stall þá gerir þú það ekki með Martial. Þannig horfi ég á þetta,“ sagði Stephen Warnock sem vann fyrir BBC á leiknum.
„Þú þarft framherja sem er í sama gæðaflokki og Bruno Fernandes, þar sem þú veist að þú færð 7-8 í einkunn í hverjum leik. Martial getur gefið þér þrjá eða fjóra í einkunn. Hann er ekki nógu góður ef United ætlar að vinna deildina.“
Enski boltinn á 433 er í boði 
