Karólína Lea Vilhjálmsdóttir leikmaður Breiðabliks hefur náð samkomulagi við þýska stórveldið FC Bayern. Vísir.is segir frá þessu.
Karólína Lea er tvítug og getur spilað á miðjunni og á kantinum. Hún hefur fest sig í sessi sem lykilmaður hjá A-landsliði kvenna.
Karólína mun skrifa undir þriggja og hálfs árs samning við Bayern en hún heldur til Þýskalands á morgun. FC Bayern hefur náð samkomulagi um kaupverðið á Karólínu.
Bayern er á toppnum í þýsku úrvalsdeildinni og er liðið með fimm stiga forskot á Wolfsburg sem hefur haft yfirburði í deildinni síðustu ár.
Bayern vann deildina síðast árið 2016 en Dagný Brynjarsdóttir varð þýskur meistari með Bayern árið 2015.