Stjórn knattspyrnudeildar KR hefur ákveðið að vísa ákvörðun Knattspyrnusambands Íslands um að hætta keppni í Íslands- og bikarmóti sambandsins, til áfrýjunardómstóls sambandsins. Þetta kemur fram í yfirlýsingu sem stjórn knattspyrnudeildar KR sendi frá sér í dag.
Stjórn knattpspyrnudeildar KR telur að ákvörðun KSÍ fari gegn ákvæðum laga sambandsins og að sambandinu hafi ekki verið heimilt að ljúka keppni eins og ákveðið var í gær. Stjórn knattspyrnudeildar KR vill að ákvörðunin verði felld úr gilldi.
Yfirlýsing KR:
„Stjórn knattspyrnudeildar KR ákvað á fundi sínum nú morgun að vísa ákvörðun stjórnar KSÍ, um að hætta keppni í Íslands- og bikarmóti, til árýjunardómstóls sambandsins. KR telur að ákvörðun stjórnarinnar, er byggir á reglugerð stjórnar, fari gegn ákvæðum laga sambandsins. Þannig hafi stjórn sambandsins ekki verið heimilt að ljúka keppni líkt og gert var. KR ætlar þannig að ákvörðun sambandsins sé ólögmæt og mun krefjast þess að ákvörðun stjórnar verði felld úr gildi.“
fh. knattspyrnudeildar KR
Páll Kristjánsson, formaður
