Sjaak Swart umboðsmaður Donny van de Beek sem gekk í raðir Manchester United er ósáttur með að skjólstæðingur sinn þurfi að verma tréverkið í upphafi leiktíðar á Englandi.
Van de Beek er eini leikmaðurinn sem Manchester United hefur keypt í sumar en hollenski miðjumaðurinn kom frá Ajax í sumar.
„Varamaður? Ég er ekki sáttur með það, ég gat varla horft á þetta. Hann fékk fjórar mínútur í leiknum,“ sagði Swart við hollenska miðla eftir sigur United á Brighton um liðna helgi.
Van de Beek ætti að byrja í kvöld þegar United heimsækir Brighton aftur en nú í enska deildarbikarnum. „Hann gerði góða hluti, hann hjálpaði til við að fá vítaspyrnuna þar sem sigurmarkið kom.“
Van de Beek skoraði mark United í tapi gegn Crystal Palace í fyrstu umferð. „United hefði átt að tapa 7-1 gegn Brighton sem skutu fimm sinnum í tréverkið. Brighton er með fínasta lið en þetta á ekki að koma fyrir hjá Manchester United.“