Jóhannes Kristinn Bjarnason, 15 ára sonur Bjarna Guðjónssonar lék sinn fyrsta leik með meistaraflokki KR í kvöld er liðið mætti Keflavík. Bjarni er aðstoðarþjálfari liðsins en Jóhannes Kristinn er gríðarlegt efni. Leiknum lauk með 1-1 jafntefli
Stórlið hafa fylgst með framgöngu hans um nokkurt skeið þrátt fyrir ungan aldur og í vetur fór hann í heimsókn til Rangers í Skotlandi. Hann æfði einnig með FCK í Danmörku og Genk í Belgíu.
Faðir hans átti frábæran feril og lék lengi vel erlendis auk þess að verða Íslandsmeistari með KR og ÍA og koma nokkuð við sögu með íslenska landsliðinu.
Jóhannes er klókur miðjumaður en mikið hefur verið látið með kauða frá unga aldri og verður fróðlegt að sjá hvort hann fái tækifæri með KR í sumar en Pepsi Max-deild karla hefst eftir tæpar tvær vikur. Jóhannes Kristinn hefur spilað fyrir U15 ára lið Íslands.
Birgir Steinn Styrmisson sem er fæddur árið 2004 lék einnig sinn fyrsta leik og sömu sögu er að segja um Valdimar Daða Sævarsson sem er fæddur árið 2002.
