Gary Martin hefur yfirgefið lið Val í Pepsi Max-deild karla en þetta staðfesti félagið fyrir helgi. Gary kom til Vals fyrir þetta tímabil en honum var bannað að mæta á æfingu hjá félaginu undir restina.

Ólafur Jóhannesson, þjálfari Vals og Gary áttu ekki skap saman og var ákveðið að rifta samningi leikmannsins. Gary gekk í raðir Vals í janúar og gerði þriggja ára samning, ljóst er að Valur hafur þurft að greiða framherjanum talsverða upphæð.

„Gary Martin fer hlæjandi í bankann og getur spilað með nýju liði 1. júlí. Það er rétt að staldra við. Hvað er í gangi á Hlíðarenda? Þetta er félag sem keypti átta leikmenn fyrir tímabilið, það eru menn þarna hoknir af reynslu og þetta eru Íslandsmeistarar tveggja síðustu ára. Þeir eru með fjögur stig og ekki búnir að vinna leik á Hlíðarenda. Hvað er í gangi?,“ spurði Hörður Magnússon í Pepsi Max-mörkunum í igær.

Valur er í krísu, liðið er með fjögur stig eftir sex umferðir. Liðið er tólf stigum á eftir toppliði ÍA. Íslandsmeistarar síðustu tveggja ára, eru í veseni.

„Eins og aðstoðarþjálfarinn þeirra sagði þá eru þeir í annarri baráttu en þeir bjuggust við eftir að hafa fengið alla þessa leikmenn. Eftir leikinn við FH, sem mér fannst mjög góður leikur hjá þeim, þá taldi ég að Valsliðið væri að koma sér aftur á strik og ætti alveg möguleika á að berjast á toppnum og vinna titilinn aftur. Eftir þennan leik í dag bendir aðstoðarþjálfarinn þeirra réttilega á það að það er fallbarátta fram undan. Þeir þurfa að sætta sig við það,“ sagði Þorvaldur Örlygsson.