Edinson Cavani, leikmaður Paris Saint-Germain, kom sér í fréttirnar á dögunum eftir leik Úrúgvæ og Brasilíu.
Cavani braut þá nokkuð klunnalega á Neymar, leikmanni Brasilíu en þeir leika saman hjá PSG.
Cavani hefur síðan þá tjáð sig um brotið og gerði lítið úr atvikinu enda er mikill hiti þegar tvö lið frá Suður-Ameríku mætast.
Kylian Mbappe, liðsfélagi þeirra beggja, hafði gaman að þessu og sendi Neymar skilaboð á WhatsApp eftir brotið.
Mbappe sendi Neymar myndband af brotinu og segir að Brassinn hafi tekið vel í þau skilaboð.
,,Ég sendi Neymar skilaboð á WhatsApp með myndbandi af broti Cavani og hann hló af því,“ sagði Mbappe.
,,Þetta þýðir ekkert, þeir voru að spila fyrir hönd þjóðarinnar og það kemur ekki í veg fyrir að þeir spili saman hjá PSG.“
