Það var í október árið 2011 sem 15 ára George Green var á leið til Lundúna til æfinga hjá Tottenham. Síminn hringdi, Everton hafði gert 2 milljóna punda tilboð í hann. Bradford City þar sem Green var samþykkti tilboðið. Honum var líkt við Wayne Rooney, Green átti að verða næsta stórstjarna Englendinga í boltanum.
Green fékk 45 þúsund pund fyrir að skrifa undir, hann gerði tveggja og hálfs árs samning.
Fjórum árum síðar var allt hrunið, hann fékk ekki lengri samning hjá Everton og ætlaði að binda enda á eigið líf.
,,Ég var í svo miklum skuldum, ég hélt að ég myndi missa kærustu mína vegna eiturlyfja notkunar minnar. Ég sá ekki neina leið til baka í fótboltann,“ sagði Green sem opnar sig nú í samtali við BBC.
Green er í dag hjá Chester í sjöttu efstu deild á Englandi en hann hefur verið í herbúðum Burnley og fleiri liða.
,,Andleg heilsa og fíkn er eitthvað sem ég berst við á hverjum degi, ég geri mitt besta. Ef aðrir geta lært af sögu minni. Þá vil ég hjálpa.“
Green fékk þau skilaboð árið 2015 að hann myndi ekki fá lengri samning hjá Everton. ,,Áður en ég varð 18 ára þá fór ég aldrei út, þegar ég varð 18, þá breyttist allt. Ég drakk, notaði eiturlyf og spilaði fótbolta.“
,,Ég var að horfa á fótbolta á krá þegar mér var boðið kókaín í fyrsta skipti, ég tók það og það breytti lífi mínu.“
Áður en langur tími leið var Green í djúpum dal, hann tók um 30 grömm af kókaíni á mánuði. ,,Ég eyddi yfir 300 þúsund krónum í kókaín á mánuði, ég man eftir einum mánudegi þegar ég vaknaði ekki til að fara á æfingu.“
,,Ég vaknaði bara síðdegis, ég hafði kíkt á félaga minn kvöldið áður. Við drukkum og tókum kókaín, ég held að Everton hafi byrjað að hafa áhyggjur þá.“
,,Ég fór að hringja símtöl eitt kvöldið að leita að hálp, ég grét og öskraði á hjálp.“
Green hefur þénað vel á ferli sínum en á ekkert eftir. ,,Ég hef þénað yfir 500 þúsund pund en ég á einn iPad til að sanna það. Líf mitt hefur hrunið, líf mitt varð svona vegna eiturlyfja.“
,,Gott kvöld úti kostaði yfir 200 þúsund krónu, ég keypti kampavín fyrir mig og stelpur sem vildu. Ég hélt að ég myndi alltaf þéna svona vel.“
Green fer yfir kvöldið þegar hann ætlaði að binda enda á eigið líf. ,,Það tók vel á að fara frá Everton, ég var á lestarstöðinni og ætlaði að binda enda á þetta. Klukkan var um 20:00. Ég hafði skrifað bréf, öll pressan í lífinu, eiturlyfin, drykkjan og andleg heilsa voru að fara með mig. Fótboltinn gekk illa og ég átti ekki neinn pening.“
,,Það var síðan tilkynnt að lestinni hefði seinkað, þá hugsaði ég með mér að minn tími væri ekki búinn hérna. Ég settist niður og brast í grát.“
Green hefur verið edrú frá því í apríl og á von á barni með kærustu sinni.
