Pólverjar á Íslandi eru á milli steins og sleggju þegar kemur að því hvað þeir eiga að horfa á eftir hádegi í dag. Á sama tíma og Pawel Bartoszek verður á sínum fyrsta borgarstjórnarfundi mun Pólland spila við Senegal á HM. Pawel segir þetta leiðinlegt á Fésbók:
„Mikið verður leiðinlegt fyrir alla Pólverja á Íslandi sem munu fylgjast með mér á fyrsta borgarstjórnarfundi nýkjörinnar borgarstjórnar að þurfa að missa af Pólland – Senegal sem er á sama tíma. Svona er lífið!“
Hanna Katrín Friðriksson, þingmaður Viðreisnar, segir í athugasemd hjá Pawel:
„Það er ekki sleppt og haldið, en valið er þó einfalt að þessu sinni.“
Leiða má að því líkum að Hanna Katrín telji að Pólverjar hafi frekar áhuga á fótbolta en borgarfulltrúanum Pawel.
Sem betur fer byrjar leikurinn kl. 15 en borgarstjórnarfundurinn kl. 14. Pólverjar á Íslandi hafa því rúman klukkutíma til að ná Pawel áður en leikurinn byrjar.
Hér er hægt að horfa á útsendinguna úr Ráðhúsi Reykjavíkur, fundurinn byrjar kl. 14:00.
