Gunnar Smári Egilsson, stærsti eigandi útgáfufélags Fréttatímans og útgefandi miðilsins, mun hætta afskiptum af Fréttatímanum. Nýir aðilar eru á leið inn í eigendahópinn.
Þetta kemur fram í Fréttablaðinu í dag og hefur blaðið þetta eftir heimildum. Þar segir að tilkynnt verði um breytt eignarhald á næstu dögum.
Fundur var haldinn með starfsmönnum í gær þar sem framtíð útgáfunnar var rædd. Eins og komið hefur fram hefur rekstur útgáfunnar verið þungur og vakti það til dæmis athygli fyrir skemmstu þegar Gunnar Smári tilkynnti um stofnun Frjálsrar fjölmiðlunar. Markmiðið var að skapa félagsskap fólks sem vildi efla frjálsa og óháða blaðamennsku á Íslandi.
Í Fréttablaðinu í dag kemur fram að sumir starfsmenn hafi ekki fengið greidd laun á réttum tíma um mánaðarmótin.