Íslenska landsliðið tapaði fyrir Belgum í kvöld en liðin áttust við í Þjóðadeildinni.

Michy Batshuayi var maðurinn sem sá um Ísland og skoraði bæði mörk heimamanna í 2-0 sigri.

Hér má sjá það góða og slæma úr leiknum.

Plús:

Það er ekkert hægt að neita fyrir það að Belgar séu með betra lið. Frammistaðan í heildina var alls ekki of slæm.

Vörnin hélt mest allan leikinn og spiluðu þeir Kári Árnason, Sverrir Ingi Ingason og Jón Guðni Fjóluson vel.

Belgar náðu ekki að skapa sér mörg dauðafæri og flestar marktilraunir voru skot fyrir utan teig. Það var ánægjulegt að geta pirrað þá í dágóðan tíma.

Liðið virðist vera að skána á marga vegu og það má ekki gleyma því hvaða menn vantaði í kvöld, lykilmenn voru fjarverandi.

Það er ekki ósanngjarnt að halda því fram að við hefðum getað unnið þennan með Gylfa, Jóa Berg og Alfreð í sókninni.

Mínus:

Mörkin sem við fengum á okkur voru auðvitað kjánaleg. Bæði komu þau eftir einstaklingsmistök.

Hörður Björgvin svaf á verðinum er Batshuayi gerði fyrra markið og svo missti Hannes Þór Halldórsson boltann er hann gerði annað markið.

Það var mikið áfall að missa Alfreð Finnbogason í upphitun. Hann átti að byrja leikinn en meiddist áður en flautað var til leiks.

Heilt yfir var þessi Þjóðadeild ekki frábær fyrir okkur. Við náðum ekki í stig úr fjórum leikjum sem er í raun ljótt.

Markatala liðsins er 1-13 í fjórum leikjum. Það er hrikalegt að sjá. Á það að kallast ásættanlegt?