ÍBV í Pepsið-deild karla hefur fengið liðsstyrk fyrir komandi átök en liðið samdi við markvörð í dag.
Um er að ræða athyglisverðan leikmann en hann ber nafnið Rafael Veloso og kemur frá Portúgal.
Veloso á að baki fjölmarga leiki fyrir yngri landslið Portúgals en hann er uppalinn hjá stórliði Sporting Lisbon.
Veloso lék þó ekki leik fyrir aðallið Sporting en spilaði þó fyrir Belenenses í úrvalsdeildinni. Þar lék hann aðeins þrjá leiki.
Portúgalinn samdi við lið Valdres í Noregi á síðasta ári en liðið leikur í þriðju efstu deild þar í landi.
Fótbolti.net segir athyglisverða sögu af Veloso í dag en hann var handtekinn ásamt sjö öðrum leikmönnum sumarið 2016.
Markvörðurinn var sakaður um að hagræða úrslitum í leik Oriental og Oliveirense í heimalandinu og átti að hafa fengið væna upphæð fyrir að spila illa. Hann lék með Oriental í leiknum í 5-2 sigri.
Málið er enn til rannsóknar í Portúgal en Veloso var settur í bann af portúgalska knattspyrnusambandinu.
Greint er frá því að frumkvöðlar frá Malasíu hafi haft samband við leikmenn og ætluðu sér að græða á veðmálasíðum.
