Tímavélin:
Það er stranglega bannað að skipta um lið í enska boltanum, það er allavega það sem mörgum er tjáð á yngri árum.
Þeir sem hafa fundið sér lið á Englandi hafa oftar en ekki stutt við bakið á því liði allt sitt líf.
Einn frægasti stuðningsmaður Manchester City hér á landi er markvörðurinn Gunnleifur Vignir Gunnleifsson sem spilar með Breiðabliki.
Gunnleifur er harður stuðningsmaður þeirra bláu sem léku við granna sína í Manchester United í gær.
City er sterkara liðið í dag og hafði betur 3-1 á Etihad vellinum. Það ætti að hafa glatt fyrrum landsliðsmarkvörðinn.
Í dag komst þó upp um Gunnleif! Mynd af gamalli grein um markvörðinn fær að njóta sín á samskiptamiðlum.
Þar sat ungur Gunnleifur fyrir svörum eftir að hafa verið valinn markvörður Tommamótsins á sínum tíma.
Gunnleifur fékk spurninguna – Uppáhalds lið á Englandi?
,,Manchester United að sjálfsögðu og þar held ég mest upp á Bryan Robson,“ svaraði Gunnleifur.
Gunnleifur var látinn vita af þessu á Twitter og svaraði stutt fyrir sig – ,,Haha. Aldrei verið leyndarmál.“
Þjóð bíður svars eins og blaðamaðurinn Tómas Þór Þórðarson orðar það og hlýtur stóra spurningin að vera – hvenær var þessi ákvörðun tekin?