Laurent Koscielny, leikmaður Arsenal, gaf það út í dag að hann væri hættur að spila með franska landsliðinu.
Koscielny er 33 ára gamall í dag en hann meiddist undir lok síðasta tímabils og gat ekki tekið þátt á HM í sumar. Frakkar unnu mótið í Rússlandi.
Varnarmaðurinn opnaði sig í samtali við Canal+ í dag og segir að hann hafi oft viljað sjá landsliðið tapa leikjum mótsins.
,,Heimsmeistaramótið er svartur blettur á mínum ferli,“ sagði Koscielny í samtali við Canal+.
,,Ég átti í erfiðleikum með að sætta mig við meiðslin. Það var erfiðara því þeir unnu mótið og ég get verið sjálfselskur.“
,,Ég segi við sjálfan mig að ég hafi getað verið partur af þessu ævintýri og unnið mótið. Það getur enginn sett sig í mín spor.“
,,Ég var ánægður fyrir þeirra hönd en þetta var líka viðbjóðslegt. Mér leið ekki eins og ég væri heimsmeistari eins og 60 milljónir Frakka.“
,,Það er undarleg tilfinning, á mótinu þá vildi ég sjá þá komast áfram en á sama tíma vildi ég sjá þá tapa. Það er það sem ég hugsaði.“