Það voru fjölmargir enskir stuðningsmenn sem gerðu sér leið til Króatíu fyrir leik enska landsliðsins gegn heimamönnum í kvöld.

Stuðningsmennirnir vissu það þó að þeir kæmust ekki inn á völlin en leikið var fyrir luktum dyrum.

Verið er að refsa Króatíu fyrir atvik sem kom upp árið 2015 er búið var að slá hakakross í grasið fyrir leik gegn Ítalíu í undankeppni EM.

Einn stuðningsmaður Englands vildi mikið komast inn á völlinn í dag og sjá leikinn sem endaði með markalausu jafntefli.

Hann klæddi sig upp eins og öryggisverðir vallarins og vonaðist eftir því að það myndi duga til að komast inn.

Honum tókst að komast inn á völlinn en um leið og hann nálgaðist grasið var honum skipað að yfirgefa svæðið.

Stuðningsmenn Englands náðu þó að sjá leikinn en þeir fundu sér hól fyrir utan leikvanginn þar sem mátti sjá aðeins í grasið.