Sir Alex Ferguson, fyrrum stjóri Manchester United, er mættur til að fylgjast með sínum mönnum á Old Trafford í dag.
Þetta er í fyrsta sinn í dágóðan tíma sem Ferguson mætir á völlinn eftir heilablóðfall sem hann fékk fyrr á árinu.
Ferguson mætti síðast á leik United í apríl gegn Arsenal en mun fylgjast með viðureign gegn Wolves í dag.
,,Það er mjög gott að vera kominn aftur. Þetta hefur verið löng ferð en ég er að taka skref fram á við,“ sagði Ferguson við MUTV.
,,Ég geri það sem sonur minn segir mér og læknarnir. Ég er kannski smá stressaður því síðasti leikur sem ég mætti á var Arsenal í apríl. Það er langur tími síðan og ég vona bara að við vinnum í dag.“
,,Ég sakna viðtala ekki! Þessi pressa sem fylgir því að svara heimskulegum spurningum. Nei, það er gott að vera kominn aftur og þetta verður tilfinningaþrungin stund fyrir mig er leikurinn byrjar.“
,,Þetta þurfti að gerast einhvern tímann og ég hlakka til. Það var mikilvægt að tímasetja þetta rétt og fá hvíld áður en ég mætti til leiks.“
