Vísindarannsókn varpaði ljósi á hvaða fæðutegundir fólk á að borða meira af, og hvaða fæðutegundir það á að forðast, til að auka líkurnar á að lifa án stórra krónískra sjúkdóma þar til áttræðisaldri er náð.

Vísindamenn rannsökuðu matarvenjur og heilsufarsupplýsingar rúmlega 105.000 manns á aldrinum 39 til 69 ára og náði rannsóknin yfir 30 ára tímabil.

Þeir, sem fylgdu hollum matarvenjum þar sem mikið var af mat úr jurtaríkinu og lítið um ofurunnar matvörur, voru líklegri til að vera heilbrigðir þegar aldurinn færðist yfir og sýndu færri merki um hnignandi heilastarfsemi, hnignandi líkamlegt ástand og hnignandi andlega heilsu.

Átta tiltekin mataræði, sem komu við sögu í rannsókninni, sýndu fram á mikilvægi sex fæðutegunda – Ávaxta, grænmetis, grófs korns, ómettaðrar fitu, hneta og belgjurta. Sumar innihéldu einnig smávegis eða hóflega neyslu á hollum matvörum úr dýraríkinu, til dæmis fisk og ákveðnar mjólkurafurðir.

Frank Hu, yfirmaður næringarfræðideildar Harvard T.H. Chan School of Public Health í Bandaríkjunum, sagði að sögn Expressen að í fyrri rannsóknum hafi matarvenjur og tengsl þeirra við ákveðna sjúkdóma verið rannsakaðar eða hversu lengi fólk lifir. Þessi rannsókn sé mun breiðari og spurt sé hvaða áhrif mataræði hafi á getu fólks til að lifa sjálfstæðu lífi og njóta góðra lífsgæða þar til það verður gamalt?

Rannsóknin leiddi í ljós að um 9.800 manns, eða 9,3% þátttakendanna, urðu gamlir á „hollan“ hátt.

Mikilvægasta mataræðið reyndist vera Alternative Healthy Eating Index (AHEI) en í því eru matvælum og næringarefnum gefin stig eftir getu þeirra til að fyrirbyggja króníska sjúkdóma.

Fólkið, með flestu AHEI-stigin, reyndist 86% líklegra til að vera heilbrigt þegar það varð sjötugt en þeir sem voru með fæst stig.

Í AHEI er mælt með því að lítið sé borðað af rauðu kjöti og unnum kjötvörum, sykruðum drykkjum, salti og fínunnum kornvörum.

Neysla á ofurunnum matvælum reyndist tengd minni líkum á heilbrigðu öldrunarferli og skipti þá engu hvaða mataræði þátttakendurnir fylgdu.