Á síðustu árum hafa vinsældir daglegra göngutúra farið vaxandi og eru þeir nú vinsælli en nokkru sinni áður. Sumir ganga til að léttast og lækka blóðþrýstinginn en aðrir einfaldlega til að njóta útiveru og ferska loftsins. Áhrifin tala sínu máli – reglulegir göngutúrar geta haft ótrúlega góð áhrif á bæði andlega og líkamlega heilsu.
En er nóg að ganga bara? Hugsanlega ekki því rannsóknir benda til að eitt mikilvægt atriði í þessu púsluspili sé vanmetið – vöðvastyrkur.
Daglegar gönguferðir eru frábærar fyrir hjartað og andlegu heilsuna en þær styrkja vöðvana ekki nóg. Vöðvar eru mikilvægir, sérstaklega þegar fólk er komið yfir þrítugt því þá hefst vöðvatap. Edfisica skýrir frá þessu.
Fram kemur að vöðvar séu ekki bara til skrauts eða til að lyfta þungum lóðum í líkamsræktarstöðinni. Þeir gegna lykilhlutverki við að halda líkamanum sterkum, stöðugum og virkum dagsdaglega. Gönguferð sem gleður, gerir þig ekki endilega sterka(n).
Vísindamenn hafa sýnt fram á að styrktaræfingar eru afgerandi þegar kemur að löngu og heilbrigðu lífi. Niðurstöður rannsóknar, sem var birt í Journal of Gerontology, sýndu að þeir sem stunduðu styrktaræfingar að minnsta kosti tvisvar í viku, voru í 46% minni hættu á að deyja ótímabærum dauða en þeir sem stunduðu aðeins úthaldsæfingar.
Styrktaræfingar þurfa ekki að byggjast upp á að lyfta miklum þunga af miklum móð. Nokkur skvött eða armbeygjur heima við nægja til að halda vöðvunum gangandi. Það þarf því ekki að kaupa dýr líkamsræktartæki. Motta, stóll og 10 mínútna reglulegar æfingar geta gert kraftaverk.
Haltu því endilega áfram með daglegu göngutúrana en bættu styrktaræfingum við. Með því eykur þú líkurnar á löngu lífi með meiri lífsgæðum og meiri hreyfanleika þegar aldurinn færist yfir.
