Áður óþekktur hópur rússneskra tölvuþrjóta stóð á bak við umfangsmikla tölvuárás á NATÓ, hollensku lögregluna og vestræn ríki, sem eiga það öll sameiginlegt að styðja Úkraínu. Að minnsta kosti 10.000 nettengdar myndavélar voru einnig skotmark hakkara sem tengjast rússneskum leyniþjónustustofnunum nánum böndum.

Þegar þetta komst upp fór mikill skjálfti um hollensku lögregluna og vestræn ríki. Eru hakkararnir sagði hafa náð leynilegum upplýsingum úr tölvukerfi hollensku lögreglunnar um starfandi lögreglumenn og önnur mjög viðkvæm gögn.

Það komst upp um þessa netárás í september en nýlega kom í ljós að hún var bara hluti af miklu stærri árás sem beindist að NATÓ og mörgum Evrópuríkjum. Einnig kom í ljós að hakkararnir eru nátengdir leyniþjónustustofnunum Pútíns.

Hollenska leyniþjónustan skýrði frá þessu eftir langvarandi rannsókn á árásinni í september.

Hollensk yfirvöld hafa nefnt hakkarahópinn „Laundry Bear“. Peter Reesink, forstjóri leyniþjónustu hollenska hersins, sagði að hópurinn reyni að komast yfir upplýsingar um kaup og framleiðslu hergagna vestrænna ríkja og vopnasendingar Vesturlanda til Úkraínu.

Reuters segir að Laundry Bear hafi ekki vakið neina athygli yfirvalda þar til upp komst um innbrotið í tölvukerfi hollensku lögreglunnar í september. Hópurinn hefur einnig beint spjótum sínum að fyrirtækjum sem framleiða tæknibúnað sem ekki má selja til Rússlands.