Bandaríkin vörpuðu sprengjum á Íran í gærkvöldi, þar með talið á þrjár kjarnorkustöðvar í Fordow, Natanz og Isfahan. Donald Trump Bandaríkjaforseti ávarpaði þjóð sína í kjölfarið og sagði að kjarnorkustöðvunum hefði verið tortímt og að Bandaríkin muni ekki hika við að varpa sprengjum á fleiri skotmörk ef Íran semur ekki um frið.
Talið er að Bandaríkin hafi varpað risastórri sprengju sem kallast „byrgjabaninn“ (e. bunker buster) til að hæfa kjarnorkurannsóknarstöðina í Fordow sem er grafin djúpt í jörðu, en fréttamaðurinn Sean Hannity á Fox-fréttastofunni segist hafa rætt við Trump sem hafi staðfest að 6 slíkum sprengjum hafi verið varpað á Fordow.
Myndband sem var sýnt í íranska ríkissjónvarpinu eftir árásina sýndi reyk frá svæði Fordow svo ætla má að sprengjurnar hafi náð markmiði sínu. Engu að síður hafa íranskir embættismenn gert lítið úr árásinni. Einn þingmaður segir að sprengjurnar hafi vissulega hæft skotmörk sín en aðeins valdið yfirborðskenndu tjóni. Leiðtogar Íran hafa varað við því að árásin muni hafa viðvarandi afleiðingar og hafa beðið um neyðarfund hjá Öryggisráði Sameinuðu þjóðanna.
Lítið hefur þó heyrst frá æðstaklerk Íran, Ayatollah Khamenei, en hann sagði fyrr í vikunni að bein afskipti Bandaríkjanna að átökum Íran og Ísrael myndu hafa í för með óbætanlegt tjón enda muni Íran ekki gefast upp. Aðalframkvæmdastjóri Alþjóða kjarnorkumálastofnunarinnar, Rafael Mariano Grossi, hefur boðað til neyðarfundar hjá stofnunn sinni í ljósi aðstæðna.
Þjóðaleiðtogar Evrópu hafa í nótt og í morgun kallað eftir því að Íran snúi aftur til friðarviðræðna fremur en að stigmagna frekar átökin. Utanríkisráðherra Íran, Abbas Araghchi, spyr þó hvernig Íran geti snúið aftur í viðræður sem aldrei voru yfirgefnar. „Í síðustu viku vorum við í samningaviðræðum við Bandaríkin þegar Ísrael ákvað að sprengja þær diplómatísku viðræður upp. Í þessari viku áttum við samræður við Evrópusambandið þegar Bandaríkin ákváðu að sprengja upp þær viðræður. Hvaða ályktanir á maður að draga frá þessu?, spurði Araghchi og einnig: „Hvernig getur Íran snúið aftur í eitthvað sem landið yfirgaf aldrei, hvað þá sprengdi í loft upp?“
