Páskarnir eru skammt undan og þá munu margir bregða undir sig betri fætinum og fara í ferðalag. Sumir fara til útlanda og eflaust margir til Kanaríeyja eða annara hluta Spánar. Þeir, sem ætla að gera það, ættu að lesa áfram því spænska lögreglan hefur sent frá sér aðvörun til ferðamanna.

Samkvæmt frétt El Periódico þá varar lögreglan ferðamenn við hinni svokölluðu „50 evru brellu“ en henni er beint að þeim sem eru með bíl til umráða.

Hún gengur út á að 50 evruseðill er settur undir rúðuþurrkuna, farþegamegin.

Þegar stigið er út úr bílnum til að skoða seðilinn eða taka hann, láta þjófarnir til skara skríða og á örskotsstund taka þeir töskur, farsíma, veski og önnur verðmæti úr bílnum og láta sig hverfa hið snarasta á braut.

Þeir leika þennan leik oft á bílastæðum, þar sem mikið annríki er, og við verslunarmiðstöðvar.

Lögreglan segir að svikahrapparnir vinni svo hratt og nákvæmlega að erfitt sé fyrir fólk að bregðast við.