Eins og greint var frá í síðustu viku voru afi og amma drengsins handtekin á heimili sínu fyrir utan frönsku borgina Marseille á dögunum, en auk þess voru tvö börn hjónanna, sem eru í kringum tvítugt, handtekin. Telur lögregla að fjölskyldan hafi myrt litla drenginn.
Sjá einnig: Vendingarnar í máli Émile litla – Lögregla hleraði símana mánuðum saman
Émile var í heimsókn hjá afa sínum og ömmu á sumarleyfisstað fjölskyldunnar í Haut-Vernet þegar hann hvarf. Þetta var í júlí 2023 en líkamsleifar hans fundust svo í mars 2024.
Ýmsum kenningum var varpað fram um hvað kom fyrir en áverkar voru meðal annars á höfuðkúpunni og veltu ýmsir því fyrir sér hvort úlfar hefðu numið drenginn á brott. Þá var ekki útilokað að hvarf hans hefði verið af mannavöldum. Enn önnur kenning var á þá leið að Émile hefði orðið fyrir vinnuvél á svæðinu þar sem uppskerutími var þegar hann hvarf.
Það var amma Émile sem hringdi í lögregluna þann 8. júlí 2023 og tilkynnti hvarf hans. Hún sagði að Émile hafi sofið fram undir klukkan 17. Þegar hún hringdi í lögregluna klukkan 18.12 hafði hún leitað hans í 45 mínútur og virt hann hafa ráfað burt.
Lögregla telur hins vegar að líki drengsins hafi verið komið fyrir og geymt í umhverfi sem kemur í veg fyrir rotnun, frosti þá að öllum líkindum. Rannsókn á beinum drengsins og fötunum sem hann klæddist leiddu í ljós að þau höfðu verið í einhvers konar „vernduðu umhverfi“ áður en þau fundust. Þá voru ummerki um þung högg á höfuðkúpunni.
Lögregla hefur rætt við 287 vitni í málinu og hefur yfirmaður lögreglu sagt að fimmtán lögreglumenn hefðu unnið öllum stundum að rannsókn málsins síðan í júlí 2023.
Le Parisien greindi frá því í síðustu viku að lögregla hefði meðal annars hlerað síma nánustu aðstandenda Émile mánuðum saman áður en hún lét til skarar skríða og handtökurnar fóru fram. Þeim fjórum sem handteknir voru hefur verið sleppt úr haldi og hefur engin formleg ákæra litið dagsins ljós enn sem komið er.
