Ungur maður í Bretlandi hefur verið dæmdur fyrir að myrða vinkonu móður sinnar með afar hrottalegum hætti og að vanhelga lík hennar með kynferðislegu athæfi. Er mikil fíkn mannsins í ofbeldisfullt klám sögð hafa átt töluverðan þátt í þessu athæfi hans.
Fjallað er um málið í helstu fjölmiðlum Bretlands. Maðurinn, Ernestas Juska, er 21 árs en í ágúst á síðasta ári myrti hann konuna, hina 39 ára gömlu Nina Denisova, á heimili móður sinnar í Dartford í Kent á Suður-Englandi.
Denisova svaf í gestaherbergi í húsinu. Eftir að hann stakk hana margsinnis og varð henni að bana nauðgaði Juska líki Denisova. Yfirgaf hann síðan heimilið og gekk að biðstöð strætisvagna þar sem hann bað mann sem var þar að hringja á lögregluna og þegar lögreglumaður kom á vettvang játaði Juska strax að hafa framið morð.
Fyrir dómi kom fram að Juska hafi verið undir miklum áhrifum stöðugrar fíknar sinnar í mjög ofbeldisfullt klám þar sem komu meðal annars fyrir lík, nauðganir og dýraklám. Saksóknarni sagði það í raun raunhæft að álykta að vegna þessa áhorfs hafi Juska farið svona með lík Denisova.
Um kvöldið hafði Juska verið á heimili móður sinnar ásamt Denisova og fleiri vinum. Hann neytti bæði áfengis og kókaíns og reiddist þegar móðir hans fór að gagnrýna hann fyrir að vera atvinnulaus. Hann ákvað að hann langaði að drepa einhvern en vildi ekki að það yrði móðir sín eða systir en Denisova var þá farin að sofa og varð hún fyrir valinu.
Rétt um klukkan sex að morgni fór hann með stærsta hnífinn sem hann fann inn í gestaherbergið og stakk Denisova í hálsinn. Hún byrjaði að streitast á móti og öskra. Setti þá Juska hönd yfir munn hennar og stakk hana í augun og svo kviðinn og brjóstið og misnotaði hana síðan kynferðislega.
Denisova hafði flutt til Bretlands frá Litháen 2006.
Dómari dæmdi Juska í lífstíðarfangelsi með möguleika á reynslulausn eftir 26 ár. Hann sagði verknaðinn viðurstyggilegan og ljóst væri að síðustu andartök ævi Denisova hefðu verið einstaklega hryllileg.
