„Stiginn til himins“ var gerður af bandaríska hernum í síðari heimsstyrjöldinni en hann er á Hawaii. Allt frá því að hann var gerður hefur hann verið tilefni deilna. Honum hefur verið lokað og síðan opnaður á nýjan leik og aftur lokað og aftur opnaður og það margoft. En 2021 ákvað borgarstjórn Honolulu að láta fjarlægja stigann.

Ástæðan var að hann væri of hættulegur og að áhugi ferðamanna á honum væri íbúum til ama.

Í apríl á þessu ári var byrjað að fjarlægja stigann en það virðist hafa vakið meiri áhuga á honum en áður. CNN segir að á samfélagsmiðlum megi sjá þekkta einstaklinga, sem halda úti rásum á YouTube og Instagram, hunsa bannið og fara upp þau 4.000 þrep sem liggja upp á topp fjallsins.

Yfirvöld eru að vonum ekki ánægð með þetta og sagði Jason Redulla, yfirmaður björgunarmála á Hawaii, að það sýni sjálfselsku og algjört virðingarleysi að fólk fari upp Haiku-stigann eða Middle Ridge slóðann þar sem öll umferð sé bönnuð.

„Einhver mun slasast eða deyja,“ ef fólk virðir ekki bannið, er haft eftir honum í tilkynningu frá borgaryfirvöldum.