Litlu mátti muna að illa færi hjá fjölskyldu einni í New Jersey í Bandaríkjunum þegar býsna stórir klakar lentu á þaki hússins – örfáum metrum frá fjölskyldunni þar sem hún sat úti í garði.

Talið er öruggt að klakarnir hafi losnað af flugvél sem flogið var yfir svæðið og er málið í rannsókn hjá bandarískum flugyfirvöldum.

Atvikið átti sér stað á miðvikudagskvöld og segir Sabrina Gomez að þau hafi heyrt hvin í loftinu rétt áður en klakarnir lentu á þakinu. Einn var svo stór að hann gerði gat á þak hússins.

Atburðarásin náðist á eftirlitsmyndavél og eins og sjá má hér að neðan var fjölskyldunni eðlilega brugðið. Heimili fjölskyldunnar er á svæði þar sem mikið er um flugumferð og segir Sabrina að farþegaþota hafi einmitt verið í loftinu fyrir ofan húsið þegar klakarnir féllu á þakið.

Sabrina segir að fjölskyldan sé þakklát fyrir að ekki fór verr, enda sátu þau úti á verönd hússins þegar atvikið varð – örfáum metrum frá staðnum þar sem stærsti klakinn lenti.