Fertugur belgískur karlmaður var í gær sýknaður af ákæru um að hafa ekið undir áhrifum áfengis. Fyrir dómi sannaði maðurinn að hann þjáist af sjúkdómnum ABS, auto-brewery syndrome, sem gerir að verkum að líkami hans breytir kolvetnum í alkóhól og hann getur orðið drukkinn án þess að drekka svo mikið sem einn dropa af áfengi.

Anse Ghesquiere, lögmaður mannsins, sagði í samtali við Reuters að vísindamenn telji að fjöldi ABS-sjúklinga á heimsvísu sé mjög svo vanmetinn en um 20 manns hafa verið greind með sjúkdóminn á heimsvísu.

Ghesquiere sagði að það sé síðan „óheppileg tilviljun“ að maðurinn starfar í brugghúsi.

Hún sagði að maðurinn hafi gengist undir rannsóknir hjá þremur læknum til að staðfesta sjúkdóminn og féllst belgískur dómstóll á niðurstöðu rannsóknar þeirra og sýknaði manninn af ákæru um ölvunarakstur.

Maðurinn var sektaður og sviptur ökuréttindum tímabundið 2019 fyrir ölvunarakstur. Hann mótmælti þeirri niðurstöðu og þvertók fyrir að hafa drukkið áfengi en þá vissi hann ekki af sjúkdómi sínum.

Maðurinn fylgir nú sérstöku mataræði þar sem hann borðar mjög lítið af kolvetnum til að koma í veg fyrir að líkami hans framleiði meira alkóhól.