Í síðustu viku voru 16 meðlimir glæpagengis dæmdir í samtals rúmlega 70 ára fangelsi fyrir peningaþvætti og smygl á fólki. Talið er að gengið hafi smyglað 70 milljónum punda í reiðufé frá Bretlandi. Voru peningarnir fluttir til Dubai á árunum 2017 til 2019 og voru mörg hundruð ferðir farnar með þá.

Sky News segir að talið sé að glæpagengið hafi aflað peninganna með sölu eiturlyfja og með því að smygla fólki.

18 meðlimir glæpagengisins voru ákærðir í málinu og var leiðtogi þess, Charan Singh, dæmdur í 12 og hálfs árs fangelsi. Næstráðandi hans, Valjeet Singh, var dæmdur í 11 ára fangelsi. Aðrir meðlimir glæpagengisins voru dæmdir í fangelsi allt frá 11 mánuðum til 10 ára.

Lögreglan lagði hald á 1,5 milljónir punda í reiðufé en greining á fluggögnum og tilkynningum um reiðufé leiddu í ljós að háum fjárhæðum hafði verið smyglað úr landi.

Glæpagengið var staðið að smygli á 17 afgönskum flóttamönnum, þar á meðal fimm börnum á aldrinum 5 til 14 ára, sem hollenska lögreglan fann í flutningabíl 2019. Fólkið var falið í tveimur sérútbúnum hólfum, með engum loftgötum, bak við fjölda dekkja.