Konur, sem fá tíðahvörf snemma á lífsleiðinni, eru hugsanlega í meiri hættu á að þróa með sér elliglöp. Þetta eru niðurstöður rannsóknar bandarískra vísindamanna sem komust einnig að því að ef hormónameðferð hefst um það leyti sem tíðahvörf hefjast virðist hættan á elliglöpum hverfa.

The Guardian skýrir frá þessu og segir að um bráðabirgðaniðurstöður sé að ræða sem þurfi að staðfesta með stærri rannsóknum.

JoAnn Manson, aðalhöfundur rannsóknarinnar og læknir við Brigham and Women´s sjúkrahúsið í Boston, sagði í samtali við The Guardian að tímasetningin skipti öllu máli þegar kemur að hormónameðferð.

Um 10% kvenna upplifa snemmbúin tíðahvörf en þau eru skilgreind sem svo ef þau hefjast fyrir fertugt. Snemmbúin tíðahvörf hafa verið tengd við auknar líkur á að þróa Alzheimers með sér. Ekki er vitað með vissu hvort breytingar á kynhormónum eiga þar sök á.