Ef fólk sefur styttra en sex klukkustundir á sólarhring þá dregur það úr ónæmisviðbrögðum líkamans við bóluefnum. Þetta á sérstaklega við um unga karlmenn. Þessi samdráttur ónæmisviðbragða er sambærilegur við dvínandi áhrif COVID-19 mótefna tveimur mánuðum eftir bólusetningu.

The Guardian skýrir frá þessu. Fram kemur að vitað sé að viðbrögð ónæmiskerfisins við bólusetningu séu breytileg og háð þáttum á borð við aldur, kyn og almennt heilsufar. Fyrri rannsóknir hafi bent til að nætursvefn skipti einnig máli en niðurstöður rannsóknar á því hafi verið mismunandi.

Vísindamenn sameinuðu og endurgreindu sjö rannsóknir sem tengdust bólusetningu gegn inflúensu og lifrarbólgu A og B en veirur valda þessum sjúkdómum.

Vísindamennirnir báru ónæmisviðbrögð líkamans, hjá þeim sem sváfu sjö til níu klukkustundir á nóttu, saman við viðbrögðin hjá þeim sem sváfu undir sex klukkustundum á nóttu.

Í rannsókninni, sem hefur verið birt í Current Biology, kemur fram að sterkar sannanir hafi fundist fyrir að það að sofa undir sex klukkustundum dragi úr ónæmisviðbrögðum við bólusetningum hjá körlum. Áhrifin voru breytilegri hjá konum, líklega vegna sveiflna í hormónum.

Vitað er að kynhormónar hafa áhrif á ónæmiskerfið. Hjá konum hefur tíðahringurinn áhrif á ónæmi og notkun getnaðarvarna á einnig hlut að máli sem og hvort konurnar eru búnar að ganga í gegnum tíðahvörf.