Japanska ríkisstjórnin býður nú foreldrum 1 milljón jena, sem svarar til 1,1 milljónar íslenskra króna, á barn fyrri að flytja með þau frá Tókýó. Markmiðið með þessu er að reyna að snúa fólksfækkun á öðrum svæðum við.

Áður voru 300.000 jen í boði fyrir að flytja með barn frá Tókýó en frá og með apríl verður upphæðin hækkuð í 1 milljón jena að sögn The Guardian.

Íbúum í Tókýó fækkaði á síðasta ári en það var í fyrsta sinn í sögunni sem það gerðist. Fækkunina má aðallega rekja til heimsfaraldurs kórónuveirunnar.

Stjórnmálamenn láta þessa fólksfækkun í Tókýó ekki slá sig út af laginu og telja að það þurfi að gera meira til að reyna að fækka íbúum í borginni og hvetja fólk til að hefja nýtt líf á svæðum sem eru ekki eins eftirsótt og höfuðborgin.

Víða utan stórborga á borð við Tókýó og Osaka hefur fólki fækkað og steðja margvísleg vandamál að samfélögunum vegna þess að hlutfall eldra fólks er hærra en áður og það vantar yngra fólk til starfa í ýmsum geirum.

En það er ekki nóg með að fólk geti fengið eina milljón jena með hverju barni, því það getur einnig fengið 3 milljónir jena í fjárhagsstuðning ef það flytur á svæði sem glíma við fólksfækkun og aðra erfiðleika.