Karl og kona voru flutt á sjúkrahús í gærkvöldi eftir að skotið var á hús í Enköping, sem er 65 km norðvestan við Stokkhólm. Fjölda skota var skotið á húsið að sögn lögreglunnar.

Expressen skýrir frá þessu.

Konan er á þrítugsaldri og maðurinn um 45 ára. Þau voru bæði inni í húsinu þegar skotið var á það.

Talsmaður lögreglunnar sagði að þau hefðu verið flutt á sjúkrahús með sjúkrabifreiðum. Ekki liggur fyrir hversu alvarleg meiðsl þeirra eru.

Lögreglan segir að skotið hafi verið í gegnum glugga og dyr.

Tilkynnt var um skotárásina klukkan 19.48.

Fleiri en hin særðu voru í húsinu þegar árásin var gerð.

Nágranni sagði í samtali við Expressen að fjölskyldan, sem býr í húsinu, sé róleg og hann heilsi þeim alltaf úti á götu.