Maður sem grunaður er um að hafa ætlað að fremja fjöldamorð í samkomuhúsi gyðinga í West Bloomfield í Michigan í gær er sagður hafa verið drifinn áfram af hefnd eftir að hafa misst ættingja sína í loftárásum Ísraelshers í Líbanon nýlega.

Maðurinn sem um ræðir, Ayman Mohamad Ghazali, 41 árs, ók bifreið sinni inn í húsið og hóf skothríð. Hann var aftur á móti skotinn til bana áður af öryggisverði á staðnum áður en honum tókst að gera frekari skaða. Einn öryggisvörður slasaðist þegar hann varð fyrir bifreið Aymans, en hann er ekki í lífshættu.

Ayman, sem fæddist í Líbanon en var bandarískur ríkisborgari, er sagður hafa misst ættingja sína í loftárásum nýlega og er talið að hann hafi viljað hefna fyrir það. Hann er sagður hafa misst meðal annars tvo bræður sína í umræddri árás.

Lögregla gerði húsleit á heimili mannsins í úthverfi Detroit í gærkvöldi. Hann var starfsmaður veitingastaðar, en samkvæmt opinberum gögnum kom hann til Bandaríkjanna frá Líbanon árið 2011 og fékk bandarískan ríkisborgararétt árið 2016.