Rússneska útvarpsstöðin Kommersant FM var hökkuð á miðvikudaginn og var snarlega slökkt á útsendingunni þegar þjóðsöngur Úkraínu auk laga sem mótmæltu innrás Rússlands byrjuðu að spilast. Moscow Times greindi frá þessu.

„Útvarpsstöðin hefur verið hökkuð. Netstreymið kemur bráðum aftur,“ sagði Kommersant í færslu á VK-síðu stöðvarinnar sem er rússneskur samfélagsmiðill.

Eitt laganna sem spiluð voru var lagið „Við þurfum ekki stríð“ eftir hljómsveitina Nogu Svelo! sem er rússnesk rokkhljómsveit. Í textanum má meðal annars finna vitnun í utanríkisráðherra Rússlands Sergei Lavrov sem má þýða sem: „Harður gaur stendur við orð sín.“

„Pútín er ennþá rasshaus“

Rússneskar sjónvarpsstöðvar hafa einnig verið hakkaðar og hakkarar tóku niður rússnesku útgáfuna af YouTube. Ekki er víst hver stóð að þessari árás en hakkarahópurinn Anonymous hefur lýst yfir stríði á hendur Rússlands vegna innrás þess inn í Úkraínu og hefur áður staðið að árásum gegn Kommersant.

Anonymous hefur einnig haft ríkisrekna miðla að skotmarki. „Úkraínumenn, við höfum ekki gleymt ykkur. Pútín er ennþá rasshaus og við erum ennþá að vinna að stærstu hakkaðgerð sem Anonymous hefur nokkurn tímann tekið að sér,“ sagði hakkarahópurinn í færslu á Twitter-síðu þeirra.

Kommersant er í eigu rússneska auðjöfursins Alísjer Úsmanov sem er sagður góðvinur Vladímírs Pútíns