Við fyrstu sýn virðist þetta vera rómantísk saga. Evan leiðist í skólanum og byrjar að skrifa stutt skilaboð til stúlku sem hann hefur ekki hitt. Hún svarar og áður en varir eru þau farin að senda hvort öðru smá kveðju daglega.

En myndbandið er allt annað en rómantískt. Það var gert að undirlagi foreldrar sem misstu börnin sín í skotárásum í bandarískum skólum.  Meðal þeirra eru foreldrar barna sem voru myrt í Sandy Hook grunnskólanum í Connecticut í desember 2012 en þá voru 20 börn á aldrinum 6-7 ára skotin til bana. Milljónir manna hafa horft á myndbandið sem sýnir hversu „auðvelt“ það er að yfirsjást hvernig unglingur breytist í brjálaðan einstakling sem fer vopnaður í skóla og skýtur nemendur og starfsfólk.

Myndbandið hefur skotið upp kollinum á nýjan leik í kjölfar fjöldamorðsins í Uvalde í Texas á þriðjudaginn þar sem 19 börn og tveir fullorðnir voru skotnir til bana.

Ef þú horfir á myndbandið og fylgist vel með þá sérðu að í bakgrunninum á önnur og óhugnanleg saga sér stað. Einn af vinum Evans er að undirbúa sig undir að gera skotárás í skólanum.

CNN hefur eftir Nicole Hockley, framkvæmdastjóra Sandy Hook Promise, sem eru samtök sem stóðu að gerð myndbandsins, að ætlunin hafi verið að sýna hvernig sé hægt að koma í veg fyrir ofbeldi ef fólk tekur eftir merkjunum. Vekja athygli fólks á að það séu ákveðin merki sem geta bent til þess að verið sé að undirbúa ofbeldisverk. Nicole missti son sinn, Dylan, í árásinn í Sandy Hook.